Iwasang maging makata

Iwasang maging makata sa gitna ng iyong inspirasyon, kaligayahan at kalungkutan.
Iwasang kumuha ng papel at panulat kung may naiisip napananaw.
Damdaming mapanglaw.
Iwasang iromansa ang sarili kapag nag iisa.
Dahil lalo ka pang mag-iisa.

Tumingin sa kalikasan o sa minamahal mo.
Sa anyo ng lipunan.
Mahihirapan ka lang, malulungkot.
At sa kinahulihan ay magiging makata.

Iba ka nga sa karamihan pero minsan aminin mo sa sarili mo na sana katulad mo na lang sila.
Maari ka rin namang hangaan ngunit kadalasa'y hindi ka man lang kausapin.
Sasama ang loob at magmumuni-muning kung may mabuti kang kalooban,
Pero ano naman ngayon?

Iba pa rin ang taong malinang, mas napapansin.
Mas pinapansin...
Marahil wala ang mga ito sa kayamanan mo.
Pero minsan bilang tao hangad mo sana ay mayroon ka rin.
Iisipin mo ang kalagayan ng ibang tao.
Bibigyan mo sila ng atensyon na ikaw sa sarili mo ay nangangailangan din.
Iisipin mo sila at gagawa ng likhang tula, ipipilit ilagay ang sarili sa gawa.
Hangga't ikaw ay mapalayo sa ibang tao.

Huwag mo na ring pangarapin na mailagay ka sa pera.
Hindi ganun kataas ang pinagaralan mo.
Isa ka lamang hilong manunula na minsan kumukuha ng kapangyarihan sa dahong mahiwaga.
Matapang na hinaharap at ginagalit ang kalakihan ng sarili...

Kaya itapon mo na at sunugin ang lahat ng isinulat mo.
Baliin ang lapis na panulat.
Huwag munang kausapin ang butiki sa kuwarto mo.
Huwag tanungin kung ano ba ang kahulugan ng buhay.
Wala puwang ang tulad mo sa mapanlait at sa malupit na mundo.

Magbihis mayaman...iwasang maging makata...